Finalmente, todo parece indicar que se celebrará un único debate entre os tres candidatos á presidencia da Xunta das forzas con representación no Parlamento. A cita, o 20 de febreiro na TVG a partir das 21.30 horas e en directo. E é que a Compañía de Radiotelevisión de Galicia propúxolle á Xunta Electoral Central un cara a cara entre os cabezas de cartel do PPdeG, Alberte Núñez Feixóo, do PSdeG, Emilio Pérez Touriño, e do BNG, Anxo Quintana. O sinal cederáselle a todas as cadeas de televisión que queiran dispoñer das imaxes dos encontros.
A proposta foi votada o pasado mércores no Consello da Administración do ente, onde os tres partidos abordaron o plan de cobertura de cara ás eleccións. Ademais, a CRTVG propuxo tres entrevistas individuais cos tres líderes os días 25, 26 e 27. Estas iniciaranse con Quintana, candidato con menor número de escanos no Hórreo, e rematarán con Feixóo. Á presenza dos tres cabezas de lista sumaránselles debates electorais entre os números un das provincias para o 23 de febreiro e entrevistas con desconexións territoriais provinciais.
O PPdeG segue a teimar na necesidade de que "por responsabilidade" se celebre un cara a cara entre os dous candidatos con "posibilidades reais" de presidir a Xunta, en alusión a Touriño e Feixóo, e considerou un "desprezo" a negativa socialista a esta proposta. "A xente non quere un paripé, quere un debate de verdade", dixo o líder dos populares, quen chamou a socialistas e nacionalistas a "reflexionar" e a aceptar o seu reto.
Para os populares, os debates cara a cara son, ademais dun "dereito do electorado", unha "práctica habitual" de todos os países democráticos e, como exemplo, puxo as últimas eleccións americanas, nas que houbo catro cara a cara, ou as pasadas xerais, con dous debates entre José Luis Rodríguez Zapatero e Mariano Raxoi.
"Acepto se eles aceptan os debates bilaterais", aclarou Feixóo, que pide un debate entre o líder socialista, Emilio Pérez Touriño, e o nacionalista Anxo Quintana; outro entre Feixóo e Quintana; e un terceiro entre Touriño e Feixóo. O presidente do PPdeG apelou a súa condición de forza máis votada en Galiza para reivindicar o seu dereito a propor fórmulas de debate e rexeitou que "a televisión do Goberno impoña o seu modelo".
Pola súa banda, Emilio Pérez Touriño puxo de manifesto que "desde o primeiro día" asegurou que acudiría a "un debate, cos outros dous candidatos", por PPdeG e BNG, e enmarcou a postura do líder popular "na súa estratexia de embarrar" as eleccións. "Feixóo está nesta estratexia, demasiada estratexia", reprochou, e rexeitou "entrar máis" no asunto, porque "xa" dixo "a que debate" acudirá, que será o da CRTVG.
O BNG considera que o PPdeG "querer eludir" que a realidade existente en Galiza, que é "un mapa político a tres", con ese número de forzas políticas. Ademais, o Bloque valora os cambios na proposta inicial da CRTVG e entenden que a compañía "foi receptiva" ás súas propostas. Por iso, celebrou que se modificase o plan inicial de cobertura, que a organización frontista non vía axeitada para tratarse dunhas "eleccións de país".