A do 2008 foi a manifestación máis concorrida das que o BNG celebra co gallo do Día da Patria. A chuvia non foi quen de deixar na casa os perto de 25.000 manifestantes que percorreron as rúas compostelás para reclamar o autogoberno e un Estatuto de Nación. Cando milleiros de galegos comezaban a abarrotar a Praza da Quintana, parte dos manifestantes aínda acaban de saír da Alameda.
Baixo o lema 'Cremos no noso país', a marcha partiu da Alameda compostelá ao redor das 12.15 horas encabezada por Quintana, a Executiva do BNG e os conselleiros nacionalistas da Xunta. Logo de percorrer as rúas de Compostela, os manifestantes reuníronse, como cada ano, na Praza da Quintana para oír os discursos de Iria Aboi e de Anxo Quintana. Desta vez, dadas as previsións, os nacionalistas instalaron unha gran pantalla en Praterías para todos os que non foron quen de acceder ao interior da Quintana.
A primeira en intervir no acto foi a secretaria xeral de Galiza Nova. Despois de advertirlles aos alí presentes que o BNG reunira 25.000 persoas, Iria Aboi lembrou que a organización que lidera cumpre "20 anos e un día", xa que foi creada o 24 de xullo do 1988 e aventurou que "temos o compromiso de seguir traballando sen descanso". Ademais de ser a encargada de citar todos os grupos políticos que apoiaron ao BNG, entre os que se atopan os asinantes de Galeuscat , CiU e PNV, membros do Bloco da Esquerda, o Partido Comunista Português, a Unión Democrática Bretona, o partido Mapuche ou a Fronte Polisaria, entre outros, Aboi centrou o seu discurso no conflito lingüístico e reprochou que "aínda vemos vulnerados os nosos dereitos como galegofalantes".
Nada máis rematar o seu discurso a líder de Galiza Nova, Quintana fíxose co estrado entre os berros da multitude, que coreaba 'Presidente, presidente'. O portavoz nacional do BNG comezou o seu discurso aludindo á "primeira gran crise económica da globalización", que "evidencia o esgotamento do modelo enerxético baseado no petróleo". O nacionalista sinalou perante os manifestantes que acubillaba a Quintana que o BNG pon o "autogoberno ao servizo da economía real e das persoas".
Na súa intervención, o vicepresidente da Xunta apuntou que máis que nunca coma hoxe "o nacionalismo galego foi tan decisivo e tivo tantos medios políticos para facer país". "Somos máis nación porque temos máis capacidade para tomar decisións", engadiu.
Ademais de facer referencia á venda do 45 por cento de ACS en Fenosa, salientou que o BNG non permitirá que os fondos públicos se utilicen para "cadrar a conta de resultados dalgunha empresa mal xestionada", aludindo aos problemas de Martinsa-Fadesa. "Mentres o BNG teña responsabilidade na materia, os fondos públicos só se utilizarán para asegurar o acceso á vivenda ás persoas con menos recursos".
Despois de sinalar que en Galiza "hai un problema lingüístico", referíndose ao descenso no uso e a falta de normalización, Quintana salientou os logros do seu equipo de Goberno, o cambio do Decreto Eólico, a Lei Galega de Comercio, o sistema de Benestar e Igualdade, o Banco de Terras, as Unidades de Xestións Forestal, o Plan Sectorial de Vivenda Protexida, a creación de Solo Empresarial, a posta en marcha da Axencia de Industrias Culturais ou o Servizo Público de Transporte Adaptado.
Segundo apuntou o líder nacionalista, o gran reto do BNG é "construír unha nova maioría social galeguista como apoio a un novo Goberno". Tampouco se esqueceu da creación "dun novo Estatuto de Nación que Galiza precisa facer realidade no 2009.
O vicepresidente da Xunta sinalou que o BNG é "a forza do Goberno imprescindíbel". "Nós non nacemos para ser complemento de ninguén nin ser bisagra en ningún modelo multipartidario. Nacemos para liderar o país", engadiu Quintana entre os aplausos da multitude.
Cun "ánimo e adiante" e co mítico "Galiza Ceibe", Quintana despedíase dos nacionalistas antes de que soasen as primeiras notas do Himno Galego.
PSdeG e PPdeG
Pola súa banda, o PSdeG celebrou o 25 de xullo coa tradicional ofrenda floral ante o monumento de Castelao en Rianxo. O secretario xeral do PSdeG, Emilio Pérez Touriño, tras acudir á Ofrenda ao Apóstolo na Catedral compostelana, desaprazouse a Rianxo para participar na ofrenda ao intelectual.
O líder do PPdeG, Alberte Núñez Feixóo, tras participar na Ofrenda ao Apóstolo, desprazouse a Poio para participar nunha romaxe popular coa que o PPdeG festexa o 25 de xullo. Alí, ademais, estaba instalada a carpa da campaña 'Galicia en voz alta', que percorre o país para coñecer "de primeira man" as necesidades peticións dos galegos.
